२३ असोज, मुम्बई। बेलायतका प्रधानमन्त्री सर कियर स्टार्मरले भारतको पहिलो औपचारिक भ्रमणका क्रममा भारतीय प्रधानमन्त्री नरेन्द्र मोदीसँग भेटवार्ता गरेका छन्।
भारतको आर्थिक राजधानी मुम्बईमा भएको भेटमा दुबै नेताबीच व्यापार तथा लगानी विस्तारका विषयमा छलफल भएको जनाइएको छ। प्रधानमन्त्री स्टार्मर दुईदिने व्यापारिक भ्रमणका लागि मुम्बई पुगेका हुन्। यो भ्रमणमा उनीसँग १०० भन्दा बढी प्रमुख कार्यकारी अधिकारी (CEO), उद्यमी, विश्वविद्यालयका कुलपति तथा सांस्कृतिक व्यक्तित्वहरूको टोली समावेश छ – जुन बेलायतको इतिहासमै सबैभन्दा ठूलो व्यापारिक प्रतिनिधिमण्डल मानिएको छ।
भ्रमणको क्रममा भारत र बेलायतबीच गत जुलाईमा सम्पन्न ऐतिहासिक व्यापार सम्झौता कार्यान्वयनका उपायहरूबारे पनि छलफल भएको बताइन्छ। उक्त सम्झौताअनुसार भारतले बेलायती उत्पादनमा लगाइने औसत महसुल १५ प्रतिशतबाट घटाएर ३ प्रतिशत पुर्याउनेछ भने बेलायतले भारतीय कपडा, जुत्ता, गहना र समुद्री खाद्य पदार्थमा कर कटौती गर्नेछ। भारतले स्कच ह्विस्की, सौन्दर्य सामग्री, औषधि उपकरण र लक्जरी सवारीसाधन आयातमा समेत महसुल घटाउने तयारी गरेको छ।
यो व्यापार सम्झौताले बेलायतको सकल घरेलु उत्पादन (GDP) मा हरेक वर्ष ४.८ अर्ब पाउण्डको वृद्धि गर्ने र २०४० सम्म दुई देशबीचको वार्षिक व्यापारमा २५.५ अर्ब पाउण्ड थप योगदान गर्ने अनुमान गरिएको छ। हाल दुई देशबीचको वार्षिक व्यापार ४२.६ अर्ब पाउण्डमा पुगेको छ।
प्रधानमन्त्री मोदीले यो भ्रमणलाई ‘ऐतिहासिक’ भन्दै स्वागत गरेका छन्। मुम्बईका विभिन्न सडक र भवनहरूमा मोदी र स्टार्मरका हजारौं तस्वीर टाँसिएका छन्।
स्टार्मरले भारतमा पहिलो दिन डिजिटल पहिचान प्रणालीका संस्थापक नन्दन निलेकानीसँग भेट गरेका थिए। बेलायतमा पनि नागरिकहरूको रोजगार अधिकार प्रमाणित गर्न डिजिटल आइडी प्रणाली ल्याउने तयारी भइरहेकाले उक्त भेटलाई अर्थपूर्ण रूपमा हेरिएको छ।
यसैबीच, स्टार्मरले घोषणा गरेका छन् कि सन् २०२६ देखि यशराज फिल्म्सले तीन बलिउड चलचित्र बेलायतमै निर्माण गर्नेछ, जसले आठ वर्षपछि बलिउड र बेलायतबीचको चलचित्र सहकार्य पुनः सुरु गर्नेछ।
भ्रमणका क्रममा उनले फिनटेक सम्मेलनमा विशेष सम्बोधन गर्ने कार्यक्रम रहेको छ। भारत आगमनअघि उनले बेलायत भारतसँगको व्यापारिक र सांस्कृतिक सम्बन्ध अझ सुदृढ पार्ने इच्छा व्यक्त गर्दै भनेका थिए – “भिसा नियम सहज नबनाइने भए पनि, भारतसँग व्यापार र संस्कृति क्षेत्रका अवसरहरू विशाल छन्।”
स्टार्मरको भ्रमण त्यस्तो समयमा भएको हो जब भारत र अमेरिका बीच राष्ट्रपति डोनाल्ड ट्रम्पद्वारा भारतमाथि लगाइएका ५० प्रतिशत आयात शुल्कका कारण सम्बन्ध केही तनावपूर्ण छन्। त्यसैले बेलायत–भारत व्यापारिक सहकार्यलाई नयाँ उचाइमा लैजाने यो भ्रमणलाई रणनीतिक दृष्टिले पनि महत्वपूर्ण मानिएको छ।