वर्क परमिट लिएर पनि जान नपाउने अवस्था, नेपालले कूटनीतिक पहल गर्ने तयारी
२० कात्तिक, काठमाडौं । संयुक्त अरब इमिरेट्स (यूएई)को मानव संसाधन तथा इमिराती मन्त्रालयले जारी गरेका झन्डै पाँच हजार नेपाली श्रमिकका वर्क परमिट (श्रम अनुमति) अब निष्क्रिय हुन थालेका छन्, कारण — यूएईले नेपालीका लागि श्रम र भिजिट भिसा रोक्नु।
गत भदौ २४ गते यूएईमा भएको प्रदर्शन र जेलबाट नेपाली श्रमिक भागेपछि यूएई सरकारले नयाँ भिसा जारी नगर्ने निर्णय गरेको थियो। त्यसको सीधा असर अहिले वर्क परमिट पाइसकेका हजारौँ नेपालीमा परेको हो।
नेपाल वैदेशिक रोजगार व्यवसायी संघको टोलीले अध्यक्ष भुवन गुरुङको नेतृत्वमा अर्थमन्त्री रामेश्वर खनाललाई भेटी, वर्क परमिट भइसकेका नेपालीलाई पठाउन अनुमति दिन आग्रह गरेको छ। तर अर्थमन्त्री खनालले भने, “यूएईले आफ्नै सुरक्षाको कारण देखाएर भिसा नदिने निर्णय गर्नु उसको अधिकारभित्रको कुरा हो, यसमा नेपालले प्रत्यक्ष हस्तक्षेप गर्न सक्दैन,” भनेका छन्।
संघका पूर्वअध्यक्ष रोहन गुरुङले पनि यो विषयलाई कूटनीतिक माध्यमबाट समाधान खोजिने बताए। उनीहरूका अनुसार, जेलबाट भागेका नेपालीको राहदानी कालोसूचीमा राखिएको जानकारी यूएई सरकारलाई दिएर विश्वस्त पार्नुपर्नेछ।
यूएईमा श्रम अनुमति पाएपछि भिसा स्वीकृति सामान्य प्रक्रिया भए पनि अहिले हजारौँ श्रमिक मेडिकल, अन्तर्वार्ता र करार पूरा गरेर पनि अन्योलमा छन्। म्याग्दीका श्रमिक बिरे विक भन्छन्, “सबै प्रक्रिया पूरा गरेर पनि जान नपाउँदा ठूलो समस्या भएको छ।”
परराष्ट्र मन्त्रालयका प्रवक्ता लोकबहादुर पौडेल क्षेत्रीले यूएईस्थित नेपाली दूतावास यस विषयमा निरन्तर समन्वयमा रहेको बताएका छन्।
यूएई नेपाली श्रमिकको सबैभन्दा ठूलो गन्तव्य देश हो। वैदेशिक रोजगार विभागका अनुसार, प्रत्येक चारमध्ये करिब एक जना श्रमिक यूएई जान्छन्। चालु आर्थिक वर्ष २०८१/८२ मा मात्रै २ लाख ७४ हजारभन्दा बढी नेपालीले यूएईका लागि श्रम स्वीकृति लिएका थिए।