विश्वभर करिब ६१९ मिलियन मानिसलाई सताउने कम्मर दुखाइ कम गर्न सिटमा बसेर गर्न सकिने ‘सिटेड साल्सा’ प्रभावकारी देखिएको अध्ययन
विश्वभर करिब ६१९ मिलियन मानिसहरू दीर्घकालीन कम्मर दुखाइ (Lower Back Pain) बाट पीडित छन् । सामान्यतया जुत्ता बाँध्न झुकेपछि हुने चिलाउने वा पोल्ने प्रकारको दुखाइ धेरैलाई परिचित हुन्छ । तर अब विशेषज्ञहरूले यस्तो दुखाइ घटाउन सजिलो उपाय सुझाएका छन् — सिटमा बसेर गर्न सकिने ‘सिटेड साल्सा’ व्यायाम ।
कम्मर दुखाइ विश्वकै प्रमुख अपांगताको कारण हो । प्रायः यो दुखाइ पिठ्युँको तल्लो भागमा — छातीको हड्डीको अन्त्यदेखि नितम्बसम्म — महसुस हुन्छ । म्यानचेस्टर मेट्रोपोलिटन विश्वविद्यालयका फिजियोथेरापीका सह–प्राध्यापक क्रिस म्याकार्थीका अनुसार कम्मरको तल्लो दुई हड्डीबीच समस्या हुने सम्भावना बढी हुन्छ, जुन शरीरको तौल सन्तुलन राख्ने मुख्य भाग हो ।
म्याकार्थी भन्छन्, “कम्मरको यो भाग निकै कठोर हुन्छ । दुखाइ वा लामो समय नचलाउँदा स्थानीय मांसपेशी टाइट भएर चल्नै नसक्ने अवस्थामा पुग्छ ।” यस्तो अवस्थामा हल्का गतिशीलता दिने व्यायाम अत्यावश्यक मानिन्छ ।
‘सिटेड साल्सा’ व्यायाम गर्नका लागि कुर्सीमा ठाडो भएर बस्ने, खुट्टा जमिनमा मजबुत रूपमा राख्ने र काँध नचलाइ दायाँ घुँडालाई अगाडि धकेल्दै बायाँलाई पछाडि तान्ने — त्यसपछि विपरीत दिशामा दोहोर्याउने — प्रक्रिया अपनाइन्छ । यसरी श्रोणि भाग (pelvis) सानो लचकदार रूपमा हल्लिन्छ, जसले मांसपेशीलाई आराम दिन मद्दत गर्छ ।
म्याकार्थीको टोलीले गरेको प्रारम्भिक अध्ययनले देखाएको छ कि प्रत्येक ३० मिनेटमा केवल एक मिनेटको ‘सिटेड साल्सा’ गरेपछि मांसपेशीहरू रिल्याक्स हुने र दुखाइ घट्ने परिणाम प्राप्त भएको छ ।
“यो व्यायाम अफिसमा काम गर्दै गर्दा पनि गर्न सकिन्छ, कुर्सीबाट उठ्नै पर्दैन,” म्याकार्थी भन्छन् । विशेष गरी लामो समय कुर्सीमा बस्ने अफिस कर्मचारी वा वृद्ध व्यक्तिहरूका लागि यो अभ्यास निकै उपयोगी हुने देखिएको छ ।
(स्रोत: BBC)